ਮੰਨ੍ਹੀ ਛੀਨਾ ਕਹਿੰਦੈ, “ਖਾਲਿਸਤਾਨ ਬਣਨ ਤੇ ਸਿੱਖਾਂ ਆਪਸ ਵਿਚ ਹੀ ਲੜ ਮਰਨੈ।“ -ਪੜੋ ਜਵਾਬ

ਮੰਨ੍ਹੀ ਕਹਿਣ ਲੱਗਾ “ਅੱਜ ਸਿੱਖ ਲੀਡਰਾਂ ਦਾ ਹਾਲ ਵੇਖ ਲਓ। ਅਕਾਲ ਤਖਤ ਦੀ ਵੀ ਪ੍ਰਵਾਹ ਨਹੀ ਕਰ ਰਹੇ। ਹੋਰ ਵੇਖੋ ਸੰਨ 1990 ਤੋਂ ਬਾਦ ਕੀ ਕੁਝ ਹੋਇਐ। ਕਿਵੇ ਖਾੜਕੂ ਇਕ ਦੂਸਰੇ ਨੂੰ ਮਾਰ ਰਹੇ ਸਨ। ਕਿਵੇ ਸਿੱਖ ਰਾਜ ਦੇ ਪਤਨ ਮੌਕੇ ਇਕ ਦੂਸਰੇ ਦੇ ਕਤਲ ਹੋਏ।“

ਜਵਾਬ- ਗਲ ਸਿੱਧੀ ਜਿਹੀ ਹੈ ਮੰਨ੍ਹੀ ਸਾਬ ਤੁਸੀ ਖਾਲਿਸਤਾਨ ਦੀ ਕਾਇਮੀ ਦੇ ਖਿਲਾਫ ਹੋ। ਜਿੱਥੋਂ ਤਕ ਤੁਸੀ ਇਤਹਾਸਿਕ ਹਵਾਲੇ ਦਿੱਤੇ ਨੇ ਉਸ ਦਾ ਜਵਾਬ ਦੇਣ ਵਿਚ ਵੀ ਮੈਨੂੰ ਅਨੰਦ ਆਵੇਗਾ। ਜਵਾਬ ਦੀ ਜ਼ਰਾ ਦੂਜੀ ਕਿਸ਼ਤ ਵੇਖਣਾ ਜੀ। ਉਸ ਤੋਂ ਪਹਿਲਾਂ ਮੈਂ ਆਪ ਜੀ ਨੂੰ ਸਵਾਲ ਕਰਦਾ ਹਾਂ ਤਾਂ ਕਿ ਗਲ ਹੋਰ ਨਿੱਖਰ ਜਾਏ।

ਭਾਗ -1

ਤੁਹਾਨੂੰ ਪੰਜਾਬ ਦੀ ਮੌਜੂਦਾ ਤਸਵੀਰ ਦਿਖਾਉਦਾ ਹਾਂ ਤੇ ਪੁੱਛਦਾ ਹਾਂ ਕਿ ਖਾਲਿਸਤਾਨ (ਜਿੱਥੇ ਲੀਡਰ ਆਪਸ ਵਿਚ ਜੂਡਿਓਂ ਜੂਡੀ ਹੋ ਰਹੇ ਹੋਣ) ਕੀ ਅੱਜ ਦੇ ਪੰਜਾਬ ਤੋਂ ਵੀ ਬੁਰਾ ਹੋਵੇਗਾ?

1. ਕੀ ਖਾਲਿਸਤਾਨ ਦੀ ਪੁਲਿਸ ਵੀ ਆਪ ਨਸ਼ੇ ਦੀ ਸਮੱਗਲਿੰਗ ਕਰੇਗੀ? ਕੀ ਖਾਲਿਸਤਾਨੀ ਰਾਜਜੀਤ ਤੇ ਅਨੁਰਾਗ ਗੁਪਤਿਆਂ ਨੂੰ ਬ੍ਰਦਾਸ਼ਤ ਕਰਨਗੇ।

2. ਕੀ ਖਾਲਿਸਤਾਨ ਦੀ ਪੁਲਿਸ ਵੀ ਸਿਰਫ ਪਾਂਡੀਆਂ (ਕੋਰੀਅਰ) ਨੂੰ ਫੜੇਗੀ ਤੇ ਪਾਂਡੀਆਂ ਕੋਲੋ ਇਹ ਨਹੀ ਪੁੱਛੇਗੀ ਕਿ ਨਸ਼ੇ ਦੀ ਖੇਪ ਕਿਥੋ ਲਈ ਤੇ ਖਰੀਦਦਾਰ ਕੌਣ ਹੈ? 

3. ਕੀ ਖਾਲਿਸਤਾਨ ਦੀ ਪੁਲਿਸ ਵੀ ਪੰਜਾਬ ਦੀ ਜਵਾਨੀ ਦਾ ਮਿਥ ਕੇ ਘਾਣ ਕਰ ਕਰੇਗੀ ਜਿਸ ਤਰਾਂ ਅੱਜ ਗੁਪਤ ਅਜੈਂਸੀਆ ਕਰ ਰਹੀਆਂ ਹਨ?

4. ਕੀ ਖਾਲਿਸਤਾਨ ਵਿਚ ਵੀ ਚੁੱਣੇ ਹੋਏ ਪੰਜਾਬੀਆਂ ਨੂੰ ਜੇਲ ਵਿਚ ਸੁਟਿਆ ਜਾਵੇਗਾ ਜਿਵੇਂ ਅੱਜ ਅੰਮ੍ਰਿਤਪਾਲ ਨੂੰ ਸੁਟਿਆ ਹੋਇਆ ਹੈ।

5. ਕੀ ਖਾਲਿਸਤਾਨ ਦੀ ਸਰਕਾਰ ਵੀ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਕਰਾਉਣ ਲਈ ਲੱਖ ਲੱਖ ਰੁਪਿਆ ਦੇਵੇਗੀ ਜਿਵੇ ਅੱਜ ਅਜੈਂਸੀਆਂ ਦੇ ਰਹੀਆਂ ਹਨ?

6. ਕੀ ਖਾਲਿਸਤਾਨ ਦੀ ਸਰਕਾਰ ਵੀ ਪੰਜਾਬ ਵਿਚ ਅਬਾਦੀ ਦਾ ਸੰਤੁਲਨ ਵਿਗਾੜਨ ਲਈ ਪੰਜਾਬ ‘ਚ ਅੱਜ ਵੜੇ ਬੲ੍ਹੀਏ ਦਾ ਰਾਸ਼ਨ ਕਾਰਡ ਅਤੇ ਵੋਟਰ ਕਾਰਡ ਤੁਰੰਤ ਬਣਾ ਦੇਵੇਗੀ?

7. ਕੀ ਖਾਲਿਸਤਾਨ ਦੀ ਹੋਂਦ ਵੇਲੇ  ਭਾਰਤੀ ਅਜੈਂਸੀਆ ਪ੍ਰਦੇਸਾਂ ਵਿਚ ਸਿੱਖਾਂ ਨੂੰ ਬਦਨਾਮ ਕਰਨ ਖਾਤਰ ਆਪ ਹੀ ਮੰਦਰਾਂ ਦੀ ਬੇਅਦਬੀ ਅਤੇ ਹਿੰਦੂ -ਸਿੱਖਾਂ ਵਿਚ ਫਸਾਦ ਕਰਵਾ ਪਾਉਣਗੀਆਂ?

8. ਕੀ ਤੁਹਾਨੂੰ ਪਤਾ ਹੈ ਕਿ ਅੱਜ ਕੇਂਦਰੀ ਟੈਕਸਾਂ ਦੇ ਬਟਵਾਰੇ ਮੌਕੇ ਪੰਜਾਬ ਨਾਲ ਵੱਡੀ ਧੱਕੇਸ਼ਾਹੀ ਹੁੰਦੀ ਹੈ? ਤੁਹਾਨੂੰ ਪਤਾ ਹੋਣਾ ਚਾਹੀਦੈ ਕਿ ਟੈਕਸਾਂ ਦੇ ਬਟਵਾਰੇ ਮੌਕੇ ਪੰਜਾਬ ਦੇ ਬਣਦੇ 100 ਰੁਪਏ ਦਾ ਸਿਰਫ 0.86 ਰੁਪਏ ਹੀ ਭਾਰਤ ਸਰਕਾਰ ਦਿੰਦੀ ਹੈ। ਕੀ ਇਹੋ ਜਿਹੀ ਧੱਕੇਸ਼ਾਹੀ ਓਦੋਂ ਵੀ ਹੋਵੇਗੀ?

9. ਪੰਜਾਬ ਰੇਗਸਤਾਨ ਬਣਦਾ ਜਾ ਰਿਹਾ ਹੈ ਤੇ ਪੰਜਾਬ ਦਾ ਪਾਣੀ ਕੌਮਾਂਤਰੀ ਰੀਪੇਰੀਅਨ ਕਨੂੰਨ (ਭਾਵ ਹੜਾਂ ਵੇਲੇ ਜਿੱਥੇ ਦਰਿਆ ਮਾਰ ਕਰਦੇ ਹਨ, ਸੋਕੇ ਵੇਲੇ ਉਸ ਇਲਾਕੇ ਨੂੰ ਪਾਣੀ ਵਰਤਣ ਦਾ ਹੱਕ ਹੈ) ਦੀ ਉਲੰਘਣਾ ਕਰਦੇ ਹੋਏ ਪਾਣੀ ਬਾਹਰ ਕੱਢ ਦਿੱਤਾ ਗਿਆ ਹੈ। ਅੱਜ ਦਰਿਆ ਪੰਜਾਬ ਦੇ ਉਸ ਵੇਲੇ ਹੁੰਦੇ ਹਨ ਜਦੋਂ ਹੜ੍ਹ ਆਉਦੇ ਹਨ। ਕੀ ਖਾਲਿਸਤਾਨ ਇਸ ਧੱਕੇਸ਼ਾਹੀ ਦੀ ਕੌਮਾਂਤਰੀ ਪੱਧਰ ਤੇ ਅਵਾਜ ਨਹੀ ਚੁੱਕੇਗਾ?

10. ਪੰਜਾਬੀ ਮਾਂ ਬੋਲੀ ਦਾ ਹਿੰਦੀਕਰਣ ਜੋਰਾਂ ਸ਼ੋਰਾਂ ਨਾਲ ਹੋ ਰਿਹਾ ਹੈ।ਅੱਜ ਸਕੂਲੀ ਸਲੇਬਸ ਆਰ ਐਸ ਐਸ ਘੜਦੀ ਹੈ। ਕੀ ਅਜਾਦ ਖਾਲਿਸਤਾਨ ਵਿਚ ਵੀ ਇਹ ਕੁਝ ਹੋਵੇਗਾ?

11. ਪੰਜਾਬ ਅਤੇ ਸਿੱਖੀ ਦੀ ਇਮਾਰਤ ਵਿਰਾਸਤ ਨੂੰ ਕਾਰ ਸੇਵਾ ਵਾਲੇ ਬਾਬਿਆਂ ਰਾਂਹੀ ਅਜੈਂਸੀਆਂ ਲੱਗ ਪਗ ਢੁਹਾ ਚੁੱਕੀਆਂ ਹਨ ਕਿ ਖਾਲਿਸਤਾਨ ਵੇਲੇ ਵੀ ਅਜਿਹਾ ਕੁਝ ਹੋਵੇਗਾ?

12. ਕੀ ਅੰਮ੍ਰਿਤਸਰ ਹਵਾਈ ਅੱਡੇ ਨਾਲ ਜਿਹੜਾ ਵਿਤਕਰਾ ਕੀਤਾ ਜਾ ਰਿਹਾ ਹੈ ਕੀ ਅਜਾਦ ਖਾਲਿਸਤਾਨ ਵੇਲੇ ਵੀ ਅਜਿਹਾ ਹੀ ਹੋਵੇਗਾ?

13. ਸੰਨ 2001 ਤੋਂ ਬਾਦ ਪੰਜਾਬ ਵਿਚੋਂ ਕੋਈ ਲੱਖ ਕਾਰਖਾਨਾ ਬਾਹਰ ਕੱਢਿਆ ਜਾਂ ਬੰਦ ਕਰਾਇਆ ਸੀ। ਕੀ ਖਾਲਿਸਤਾਨ ਵੇਲੇ ਵੀ ਏਹੋ ਕੁਝ ਹੋਵੇਗਾ?

14. ਕੀ ਤੁਹਾਨੂੰ ਪਤਾ ਹੈ ਕਿ ਪੰਜਾਬੀਆਂ ਨੂੰ ਅੱਜ ਨੌਕਰੀਆਂ ਨਹੀ ਮਿਲ ਰਹੀਆਂ। ਕੇਂਦਰੀ ਮਹਿਕਮਿਆਂ ਵਿਚ ਤਾਂ ਇਕ ਤਰਾਂ ਨਾਲ ਬੈਨ ਲਗਾ ਹੋਇਆ ਹੈ। ਹੁਣ ਪੰਜਾਬ ਸਰਕਾਰ ਵੀ ਬਹੁਤੀਆਂ ਨੌਕਰੀਆਂ ਗੈਰ ਪੰਜਾਬੀਆਂ ਨੂੰ ਦੇ ਰਹੀ ਹੈ। ਕੀ ਖਾਲਿਸਤਾਨ ਵਿਚ ਵੀ ਇਹ ਕੁਝ ਹੋਵੇਗਾ?

--ਭਾਗ ਦੂਜਾ-

ਵੀਰ ਜੀ ਕੁਰਸੀ ਪਿੱਛੇ ਹਰ ਕੌਮ ਦੇ ਆਗੂ ਲੜਦੇ ਨੇ। ਇਥੋਂ ਤਕ ਕਿ ਪੁੱਤ ਪਿਓ ਦਾ ਕਤਲ ਕਰਨ ਤਕ ਜਾਂਦਾ ਹੈ ਤੇ ਪਿਓ ਪੁੱਤ ਦਾ। ਤੁਸੀ ਕੋਈ ਵੀ ਅਜਿਹੀ ਕੌਮ ਨਹੀ ਦਸ ਸਕਦੇ ਜਿਸ ਵਿਚ ਇਹ ਵਰਤਾਰਾ ਨਾ ਚਲਿਆ ਹੋਵੇ।ਪਿਛਲੀਆਂ ਮਿਸਾਲਾਂ ਛੱਡੋ ਖੁਦ ਇੰਦਰਾ ਗਾਂਧੀ ਨੇ ਆਪਣੇ ਪੁੱਤ ਸੰਜੇ ਨੂੰ ਗੱਡੀ ਚਾੜ ਦਿੱਤਾ ਸੀ।

ਪਰ ਖਾਲਿਸਤਾਨ ਦੀ ਕਾਇਮੀ ਪਿੱਛੋਂ ਇਸ ਦੀ ਸੰਭਾਵਨਾ ਘੱਟ ਹੋਵੇਗੀ, ਕਿਉਕਿ:-

ਖਾਲਿਸਤਾਨ ਕੋਈ ਰਾਜਾਸ਼ਾਹੀ (ਸਾਮਰਾਜ) ਨਹੀ ਹੋਵੇਗੀ ਇਹ ਲੋਕਤੰਤਰੀ ਜਮਹੂਰੀਅਤ ਹੋਵੇਗੀ।ਉਹ ਮਹਿਲ ਜਿਸ ਦੇ ਬਕਾਇਦਾ ਚਾਰ ਥੰਮ ਹੋਣਗੇ। ਕਿਸੇ ਇਕ ਥੰਮ ਦੇ ਕਮਜੋਰ ਪੈਣ ਤੇ ਦੂਸਰੇ ਹਰਕਤ ਵਿਚ ਹੋਣਗੇ: 1. ਲੈਜਿਸਲੇਟਿਵ (ਚੁਣੇ ਲੀਡਰ), 2. ਜੁਡਿਸ਼ੀਅਰੀ (ਅਦਾਲਤ), 3. ਬਿਓਰੋਕ੍ਰੈਸੀ (ਅਫਸਰਸ਼ਾਹੀ) ਅਤੇ 4. ਅਕਾਲ ਤਖਤ ਜਿਸ ਵਿਚ ਅਜਿਹੇ ਹਾਲਾਤਾਂ ਨੂੰ ਨਜਿੱਠਣ ਵਾਸਤੇ ਬੰਦੋਬਸਤ ਹੋਵੇਗਾ।

1. ਤੁਸੀ ਮਹਾਰਾਜਾ ਰਣਜੀਤ ਸਿੰਘ ਦੇ ਚਲਾਣੇ ਬਾਦ ਹੋਈ ਕਤਲੋਗਾਰਤ ਵਲ ਧਿਆਨ ਦੇ ਰਹੇ ਹੋ। ਯਾਦ ਰੱਖੋ ਖਾਲਿਸਤਾਨ ਤਾਂ ਜਮਹੂਰੀਅਤ ਹੋਣੀ ਹੈ।ਮਹਾਰਾਜਾ ਤਾਂ ਪ੍ਰਵਾਰਿਕ ਮੋਹ ਵਿਚ ਆ ਕੇ ਗੈਰ ਸਿੱਖ /ਗੈਰ ਪੰਜਾਬੀ (ਡੋਗਰੇ ਤੇ ਯੂ ਪੀ ਦੇ ਬੲ੍ਹੀਏ) ਚਿਮਚਿਆ ਨਾਲ ਘਿਰਿਆ ਹੋਇਆ ਸੀ।  ਜਿੰਨਾਂ ਦੀ ਚੁਕਣਾ ਕਰਕੇ ਉਹਨੇ ਕਾਬਲ ਸਿੱਖ ਲੀਡਰਾਂ ਨੂੰ ਰਾਜਧਾਨੀ ਤੋਂ ਦੂਰ ਰੱਖਿਆ ਸੀ। ਛੇਤੀ ਹੀ ਸਾਬਤ ਹੋ ਗਿਆ ਸੀ ਕਿ ਇਹ ਗੈਰ ਪੰਜਾਬੀ ਮੰਤਰੀ ਅੰਦਰਖਾਤੇ ਗੋਰਿਆਂ ਨਾਲ ਰਲੇ ਹੋਏ ਸਨ। ਪੜ੍ਹ ਕੇ ਸ਼ਾਇਦ ਹੈਰਾਨ ਹੋਵੋਗੇ ਕਿ ਕਿਸੇ ਵੀ ਪੰਜਾਬੀ ਨੇ ਤਖਤ ਨਾਲ ਗੱਦਾਰੀ ਨਹੀ ਸੀ ਕੀਤੀ; ਸਮੇਤ ਮੁਸਲਮਾਨਾਂ ਦੇ।

2. ਅੱਗੇ ਆਪਾਂ ਆਉਨੇ ਆਂ। 1984 ਤੋਂ ਬਾਦ ਦੇ ਹਾਲਾਤਾਂ ਤੇ। ਜਿਵੇ  ਸ਼ਾਇਦ ਤੁਸੀ ਜਾਣਦੇ ਹੋਵੋਗੇ ਕਿ 1990 ਤਕ ਪਹੁੰਚਦਿਆਂ ਖਾੜਕੂ ਲਹਿਰ ਤੇ ਭਾਰਤੀ ਖੁਫੀਆ ਅਜੈਂਸੀਆਂ ਨੇ ਲੀਡਰਸ਼ਿਪ ਤੇ ਪੂਰੀ ਤਰਾਂ ਗਲਬਾ ਪਾ ਲਿਆ ਸੀ। ਪੜ੍ਹ ਕੇ ਹੈਰਾਨ ਹੋਵੋਗੇ ਕਿ ਸਾਡੇ ਭੋਲੇ ਭਾਲੇ ਲੜਾਕੂ ਐਨ ਅਜੈਂਸੀਆਂ ਦੇ ਹੁਕਮ ਅਨੁਸਾਰ ਕਾਰਵਾਈਆਂ ਪਾ ਰਹੇ ਸਨ। ਕੌਮ ਵਿਚ ਏਨੀ ਜਬਰਦਸਤ ਲਹਿਰ ਸੀ ਕਿ ਸਾਡੇ ਕਲਾਨੌਰ ਇਲਾਕੇ ਵਿਚ ਚੌਣਾ ਚਾਰਦਾ ਗਰੀਬ ਅਨਪੜ ਮੁੰਡਾ ਖਾੜਕੂ ਬਣ ਗਿਆ ਸੀ।ਸ਼ਾਇਦ ਤੁਸਾਂ ਹਰਮਿੰਦਰ ਸਿੰਘ ਸੰਧੂ ਦੇ ਭਰਾ ਉਪਕਾਰ ਸਿੰਘ ਦੀ ਇੰਟਰਵਿਊ ਨਹੀ ਸੁਣੀ ਹੋਵੇਗੀ। ਉਹਨਾਂ ਦੱਸਿਆ ਸੀ ਕਿ ਕਿਵੇਂ ਅਜੈਂਸੀਆਂ ਜੋਧਪੁਰ ਜੇਲ ‘ਚ ਨਜਰਬੰਦ ਲੀਡਰਾਂ ਨੂੰ  ਨਕਲੀ ਚਿੱਠੀਆਂ ਲਿਖ ਲਿਖ ਇਕ ਦੂਸਰੇ ਦੇ ਖੂਨ ਦੇ ਪਿਆਸੇ ਬਣਾ ਰਹੀਆਂ ਸਨ। ਕਿਵੇ ਉਹ ਖਾੜਕੂ ਜਿੰਨਾਂ ਭਰਾ ਮਾਰੂ ਜੰਗ ਕੀਤੀ ਸੀ ਉਹ ਅੱਜ ਵੀ ਗੱਦਾਰੀ ਵਾਲੀਆਂ ਪੋਸਟਾਂ ਮਾਣ ਰਹੇ ਨੇ। ਜਰਾ ਸੋਚੋ ਕਿ ਉਹਨਾਂ ਦਾ ਇਨਕਾਊਟਰ ਕਿਓ ਨੀ ਸੀ ਹੋਇਆ।

ਪਰ ਵੀਰ ਜੀ ਅਸੀ ਖਾਲਿਸਤਾਨੀ ਦੀ ਕਾਇਮੀ ਤੋਂ ਬਾਦ ਦੇ ਹਾਲਾਤਾਂ ਦਾ ਜਾਇਜਾ ਲੈ ਰਹੇ ਹਾਂ। ਓਦੋਂ ਭਾਰਤੀ  ਖੁਫੀਆ ਅਜੈਂਸੀਆਂ ਦਾ ਸਾਡੇ ਤੇ ਰਾਜ ਨਹੀ ਹੋਣਾ। ਸਾਡਾ ਆਪਣਾ ਮਜਬੂਤ ਖੁਫੀਆ ਤੰਤਰ ਹੋਵੇਗਾ।

3. ਅੱਜ ਅਕਾਲੀ ਲੀਡਰ ਅਕਾਲ ਤਖਤ ਤੋਂ ਬਾਗੀ ਆਪਸ ਵਿਚ ਲੜ ਰਹੇ ਨੇ- ਗਲ ਬੜੀ ਹੀ ਸਾਫ ਹੈ ਜਿੰਨਾਂ ਲੀਡਰਾਂ ਨੂੰ ਪਤਾ ਹੈ ਕਿ ਪੰਜਾਬ ਦੀ ਅੱਜ ਦੀ ਸਾਰੀ ਸਿਆਸਤ ਖੁਫੀਆ ਅਜੈਂਸੀਆਂ ਦੇ ਹੱਥ ਵਿਚ ਹੈ ਅਤੇ ਜਿੰਨਾਂ ਨੇ ਘਾਲੇ ਮਾਲੇ ਕੀਤੇ ਹੋਏ ਹਨ ਉਹ ਕਦੋਂ ਅਜੈਂਸੀਆਂ ਖਿਲਾਫ ਬਗਾਵਤ ਕਰਨਗੇ। ਉਹ ਕਦੋਂ ਅਕਾਲ ਤਖਤ ਦੀ ਸਰਬਉਚਤਾ ਕਦੋਂ ਸਹਿਣਗੇ। ਅੱਜ ਬੱਚੇ ਬੱਚੇ ਨੂੰ ਪਤਾ ਹੈ ਕਿ ਬਾਦਲ ਪ੍ਰਵਾਰ ਦੀ ਪਿੱਠ ਪਿੱਛੇ ਭਾਰਤ ਸਰਕਾਰ ਹੈ। ਸੋ ਇਹ ਜੋ ਮਿਸਾਲ ਤੁਸਾਂ ਦਿੱਤੀ ਹੈ ਕਿ ਇਹ ਗੁਲਾਮੀ ਦੀ ਅਲਾਮਤ ਹੈ, ਜੋ ਅਜਾਦ ਖੁਦਮੁਖਤਿਆਰ ਖਾਲਿਸਤਾਨ ਵਿਚ ਨਹੀ ਹੋਵੇਗੀ। -ਭਬੀਸ਼ਨ ਸਿੰਘ ਗੁਰਾਇਆ